أضف سؤال أو موضوع جديد          

اشتريت منه دباب وعرض علي الخوذة

up 4 down 4
صمت الكلام 68
قبل 4 شهر و أسبوع



*السلام عليكم و رحمة الله و بركاته* 




حصلت معي سالفة مرافقة لشراء دباب وحبيت انقلها لكم عشان تكون نصيحة و درس للغير
وبنفس الوقت نصيحة للي يبيع ذمته عشان مبلغ مايسوى 




السالفة اني من منطقة القصيم اشتريت دباب ريس 150cc من احد الأشخاص بمدينة الرياض 




تواصلت مع الرجال و عاينت الدباب وطلع جديد و نظيف و ماعليه ان شاء الله وتم التوكل على الله وتم الشراء




الرجال صاحب الدباب عرض علي خوذه يقول انها جديدة واني مشتريها من وكالة سوزوكي ب 500 و اببيعها عليك ب 300 ريال




قلت انا مو مشكلة لكن بشرط انها مناسبة لمقاسي
قال هو اوك 




جيت عنده للبيت عشان استلم الدباب و جاب لي الخوذة 




جربتها طلعت صغيرة مبدئياً 
حاولت ادخلها وكانت ضيقه ، جاء هو وجلس يسحبها مع الجوانب وقال ان هذا نظامها و تتوسع طبيعي




دخلت على راسي لكن ضيقة لكن هو اكد لي انها تتوسع وقال خذها و اذا ماعجبتك بالمرة رجعها




قلت انا اوكي وعطيته 300 ريال ومشيت




وانا متجه السيارة ابركب و اروح ناداني و قال اذا ماصلحت لك الخوذة رجعها
قلت تم 




بعد ماوصلت منطقتي بالقصيم لبستها و جربتها لكن بالفعل ضيقة ولا تصلح لي نهائياً
لدرجة ان فمي و دقني طالعين من تحت وجزء من راسي من الخلف طالع




راسلت الرجال وقلت له ان الخوذة ضيقة مرة ولا ناسبتني ابد و اني ابرسلها لك مع زاجل على حسابي لأني مادري متى ابجي للرياض ولا ابي اتأخر عليك .




الرجال قال خلاص و اول ما استلمها بحولك فلوسك




قلت تم جزاك الله خير 




هذا الكلام العصر




يوم صار يالليل الرجال ارسلي رسالة يقول فيها
لاترسل الخوذة الحين لأن مامعي المبلغ حقها ولا الي اتأخر عليك




تفاجأت انا من هالكلام وحسيت بأن الموضوع فيه شي




قلت له ابرسلها لك بكرا و المبلغ حوله لي متى ماتيسرت امورك




قال اخاف اتأخر عليك زيادة و تزعل مني




قلت له انا لاتلمح لشي و المفروض انك ماتصرفت بالمبلغ الا اذا اني قلت لك ان الخوذة تمام




رد هو وكشر عن انيابه وقال الخوذة انا بعتها عليك وانت شريتها برضاك وانتهت البيعة و الفلوس صارت حق لي ولا بذمتي شي




يقول كلام كثير يحاول يبرر لنفسه و يحاول يقنع نفسه ان مابذمته شي




صار بيننا كلام من هالقبيل و جلست اذكره بكلامه انه اذا ماصلحت اني ارجعها و و و الخ




الرجال مصمم ان البيعه تمت و يقترح علي اني اعرضها بحراج وبعدها بلكني بالواتس




انا هنا قلت المبلغ مايسوى لو خسرته لكن قهرني بتحايله و بأسلوب الحنشله حقته




انا من بكرا شحنت له الخوذة و دفعت حق الشحن عشان اوصله غرض اللي له عندي على حسب ما اتفقنا
و ارسلت له رسالة من رقمي الثاني وقلت له
اتفقنا كذا وكذا و كذا 
انا رجعت لك خوذتك وطلعت من ذمتي
باقي انت ترجع لي فلوسي 
ان رجعتها لي فهذا حق لي و ان مارجعتها فأكتفي بقول حسبي الله و نعم الوكيل
وقلت له انا اسبوع بالكثير و انسى السالفة اما انت تبقى بذمتك الى يوم القيامة




الرجال اكتفى بالتبليك ضناً منه ان مالي طريق عليه الا الواتس




قلت بنفسي اكسبها حق لي احصله بالآخرة افضل بكثير من طقطقة ابواب او محضر بمركز شرطة




استغرب و اتعجب كيف يهون عليه و على امثاله انه يلهف مبلغ تافه ويحطه بذمته بكل اريحيه !!!!




لو المبلغ كبير كان نقول ان المبلغ مغري لكن 300 ريال ما تنفعه اذا بلعها ولن تضره اذا رجعها
بالعكس تكون طلعت من ذمته








آسف على الإطاله و حسبي الله عليه و نعم الوكيل







إبلاغ إبلاغ


رابط تطبيق حراج للايفون



رابط تطبيق حراج للاندرويد (الجالكسي)



الردود


الله يعوض عليك بس كان من المفترض وقتها تقوله مابيها وخلاص والرجال غلطان يرجع عن كلامه والشي ذا مو من افعال الرجال
اعرضها بحراج والله يرزقك بأحسن منها


up 2 down 0
hossam 6724 287
قبل 4 شهر و أسبوع



انت سويت الصح

وخصوصاً انك ارسلتها له ونفذت الاتفاق

وترا ما يصبر كثير من الناس على هموم الدنيا وبلاويها، الا أنه فيه يوم حساب عند أحكم الحاكمين


وإنت إن شاء الله على خير، المبلغ أصلاً بسيط ومايضرك ان شاء الله

تقدر تعتبره رصيد لك بالآخرة




up 2 down 0
نديم الطيف 70
قبل 4 شهر و أسبوع



بلاه مو رجال والله بختصار...


up 1 down 0
اودي666 144
قبل 4 شهر و أسبوع



والله زين سويت وهذا اتفاق لان قالك ان ماصلحت لك رجعها وانت طبقت كلامه ورجعتها وتذكر ان ربك يمهل ولا يهمل وراح يتحسف على اللي سواه


up 1 down 0
dark evil 422
قبل 4 شهر و أسبوع



الأشكال هذي ماينفع معهم الطيب ليتك مارسلت الخوذة طالما عارف انه مبيت النية يعني اخذ 300 وفوقها السلعة

لو الخوذة جديدة تجيب لك 300 بالراحة


up 1 down 0
يارب توفيقك 2014 1655
قبل 4 شهر و أسبوع



يا اخوان الرجل اقنعه ان الخوذة تتوسع معه بعد فترة وهو اقتنع ووافق بشرط يرجعها اذا طلع كلامه غير صحيح فلا تلومونة

عموما تطمن حقك محفوظ عند الملك العدل والفلوس اللي عنده بياكلها ويفنيها وبيظل ذنبها ليوم القيامه

وانا ما اقول لك تنازل عنه ولكن أضع هذه الآية الكريمة بين يديك وانت وطيب اخلاقك

قال تعالى (وَجَزَاءُ سَيِّئَةٍ سَيِّئَةٌ مِّثْلُهَا ۖ فَمَنْ عَفَا وَأَصْلَحَ فَأَجْرُهُ عَلَى اللَّهِ ۚ إِنَّهُ لَا يُحِبُّ الظَّالِمِينَ )




up 2 down 1
fanar1 541
قبل 4 شهر و أسبوع



ياشباب ليه الواحد يستحي من قول كلمة ( لا ) دام انك بتاخذ شي بتدفع فيه فلوس؟!انا اذا رحت محل وطولت وكثرت اسئله صحيح الواحد يستحي..لكن عادي قول ماناسبني شكرا لك..واطلع..لاتجامل في شي ماناسبك ابدا..طبعا هذا يختلف مع التعامل مع العايله او اخوياك لان لازم تسلك وتعدي اشياء ماتبغاها..لكن البيع والشراء مافيه سحى ابدا..حتى لو تلاحظون بعض الناس اللي ينزل المعارض ويتجمعون عليه الشريطيه ويبيع سيارته وهو مايبغى ويروح يتشكى للناس هنا او برى المنتدى بأنه باع وهو مايبغى لكن الشريطيه ضغطوا عليه..تقدر تقولهم ماببيع او المبلغ مايناسبني او افضل طريقه تحد سيارتك ب مبلغ قابل للتفاوض اللي يرضيك..


up 2 down 1
.ابوظافر -11
قبل 4 شهر و أسبوع



حقك ما يضيع عند اللي ما تنام عينه

حقك فوق عند رب العالمين

ومامن دأبة في الأرض ولا في السماء إلا على الله رزقها

تطمن حقك مو ضايع وبيرجع


up 1 down 1
الاحترافي 1129
قبل 4 شهر و أسبوع